小狂牛弗爆 o趙埋法蘭西

猪拉多纳

射手謝斯洛迪古斯兩場入3球

西班牙近年橫掃世界各大賽事，最近佢哋喺U21歐國盃同洲際國家盃，同樣以分組賽3戰全勝姿態出線，今晚西班牙U20喺世青盃A組對法國U20，睇怕唔會執輸，加上皇馬B隊射手謝斯洛迪古斯有料到，即使已提早出線都有本錢再贏！（TVB網絡電視01頻道及now801台周五凌晨1:00直播）

經過連續擊敗美國U20同加納U20後，西班牙U20已經提早躋身8強，雖然佢哋今屆冇已經上位嘅球星壓陣，但球員平均質素贏晒，睇住啲師兄同前輩喺U21歐國盃同洲際盃3戰全勝出線，相信佢哋都唔會放軟手腳，何況皇家馬德里B隊新星謝斯洛迪古斯兩場已有3球進帳，有佢孭飛唔憂冇波入。
高盧雄雞缺保羅普巴

再講，西班牙U20踢完兩場分組賽，只得馬德里體育會後衞查維亞文基路同西維爾中堅伊斯列佩亞圖有黃牌在身，唔需要專登收起晒啲主力，雖然對家法國U20暫時得1勝1和，形勢上仲要搶分爭出線，可惜効力祖雲達斯嘅隊長保羅普巴累積滿兩張黃牌需要停賽，冇咗佢喺中場壓陣，隨時畀西班牙U20搓到暈，絕對要唔過！