洲際盃王者戰 地膽巴西肢解殘牛

猪拉多纳

西班牙疲兵「長征」氣都咳

洲際盃「王者之戰」聽朝爆發！西班牙喺4強靠互射12碼打入決賽，成就夢幻對決，但佢哋喺該戰元氣大傷，面對戰意高昂、休息時間佔優兼有主場之利嘅巴西好惡踢，小妹睇好森巴兵喺馬拉簡拿球場「劏牛」捧盃，平手盤捧1.8倍主勝！

（無綫明珠台及高清翡翠台、中央5台周一早上6:00直播）
鬥牛兵飛決賽地路程長5倍

巴西同西班牙對上一次碰頭已經係近14年前，「森巴兵團」當時嘅王者地位亦已畀「狂牛兵團」取代，但巴西喺今屆洲際盃表現出色，令唔少人好期待呢支昔日勁旅同現今王者對決。

論整體實力、經驗及技術，小妹認為西班牙喺巴西之上，但講到狀態就未必喇！西班牙喺4強惡鬥意大利已經疲態盡現，而且踢足120分鐘，體能消耗比巴西多，休息時間又比對手少一日，加上佢哋由4強賽事城市去到決賽地點里約熱內盧嘅路程，足足長森巴兵5倍，實在懷疑佢哋可唔可以及時回復體力！

不過小妹最擔心嘅係中場核心沙維年事已高，兼經常受腳傷困擾，去到決賽未必Keep到最佳狀態，對住擅於逼搶嘅巴西，分分鐘比上場更難組織攻勢，何況碧基、沙治奧拉莫斯兩個後生啲嘅都嗌攰，尋日冇操一課添！

費特2戰入3粒效率佳

「森巴兵團」火力非常有睇頭，今屆4戰已經入咗11球，尼馬表現亦成熟得多，踢咗4場就有3個入波同2次助攻。佢嘅好拍檔費特踢法雖然冇昔日「9號仔」朗拿度咁華麗，但近兩戰入3粒證明效率取勝，喺主場球迷瘋狂打氣下有力射破卡斯拿斯十指關。
森巴防線欠穩博開大

雖然西班牙疲兵出戰，但巴西近兩場防守頻頻出錯，共失咗3粒，上場對烏拉圭堤亞高施華更犯下低級錯誤。好彩佢哋有強大火力補飛，要延續8戰開7次大嘅走勢唔難，捧1.95倍大啦！
巴西半場連開1:0波膽

巴西近8戰有7場開入球大。

西班牙近6戰4場開大，近5戰只失1球。

巴西今屆洲際盃4場賽事都喺半場開出1:0波膽。