葡萄牙黑雙煞捉加納祭旗

猪拉多纳

3戰省10粒鋒力冠群雄
高矮雙煞強爆加納！今晚繼續由世青盃16強做主菜，分組賽最強火力勁旅葡萄牙U20會喺卡塞利迎戰加納U20，葡萄牙高矮雙煞箭頭布馬同阿拿迪治超晒班，有呢對畿內亞比紹「外援」衝鋒陷陣，要炒以16強最差成績晉級嘅「黑星」有乜咁難？捧3.4倍「讓主」啦！

（TVB網絡電視01頻道及now801台周三晚11:00直播）

車仔睇中「新費高」布馬
葡萄牙青訓不嬲唔錯，今屆賽事就打起一對箭頭，其中被譽為「新費高」嘅布馬係焦點所在，現時効力士砵亭嘅佢雖然只得5呎8吋，但勝在速度夠快兼係雙槍將，家陣已經累積入咗5球排喺世青盃射手榜首席。盛傳呢位C朗師弟已經畀車路士睇中，為前途着想，仲唔趁世青盃呢個大舞台「騷哥利」，搵加納祭旗抬高身價咩！

阿拿迪治6呎2吋勁頂得
同樣喺非洲國家畿內亞比紹出世嘅阿拿迪治有成6呎2吋高，衝得、頂得，列強守將見到佢都怕怕。佢出道至今從未為葡萄牙球會効力過，就連喺葡國國內都冇人識，17歲嗰陣殺入意大利發展嘅佢，依家喺意丁球會艾比尼亞搵食，今屆已經入咗3球。葡萄牙有佢2個領導鋒線，喺分組賽3場已經喪入10粒，火力非常得人驚，今場對住實力平平嘅加納U20，使驚炒唔到？

加納呢邊，3戰只得3分排喺A組第3，係4支以小組第3進身16強嘅球隊最差成績嗰隊，能夠以得失球壓過埃及出線已經要還神。呢支09年冠軍整體實力麻麻，防線仲要係連續3場都有失波，球員信心差，今鋪輸少當贏啦！