克羅地亞抖足冷W抵博

猪拉多纳

今晚依然係世青之夜，克羅地亞U20同智利U20會合演16強好戲，「格仔軍」喺分組賽表現勁Sharp醒，最後一輪分組賽鬥新西蘭仲收起部分主力，計晒數留力砌智利，主勝有2.95倍博得過。

（TVB網絡電視02頻道及now810台周三晚11:00直播）

智利換邊後例跌Watt
克羅地亞喺F組以2勝1和不敗成績首名出線，對陣中戰將無疑係一大鼓勵，畢竟佢哋歷來最叻只係去到16強，有機會創紀錄，班生牯仔肯定加多兩錢肉緊。領隊謝利錫上場收起咗幾件主力，結果照樣以2:1砌低新西蘭，戰鬥力深不見底。上仗做後備嘅射手史迪比佩列卡同中場夏禾積米列斯域等主將，今晚會聯同守將達高域復任正選，人腳勁完整。

對手智利喺E組3場比賽都唔能夠保住清白之身，防線唔多穩陣。值得留意嘅係，佢哋除咗贏埃及，其餘兩仗嘅上、下半場嘅表現都有好大出入，一場就畀英格蘭逼和1:1，另一場明明追和伊拉克搶番氣勢，點知下半場都係要輸1:2，反映球員體能同集中力欠佳。再講，智利今仗有中場主力拿貝路要坐波監，睇怕都幾難頂得住養精蓄銳嘅克羅地亞。