永順益體力佔優

猪拉多纳

　　尚有3期賽事，終於可以唞唞。來到季尾真係有啲吃不消，沙田經常跑11場，臨尾谷草又整9場，賽事多到密不透風，先唔好講難唔難賭，或者贏與輸，淨係叫你睇晒咁多場排位，已經睇到頭都暈，好似我哋呢啲上咗年紀嘅，更加睇到眼痛，所以話，就嚟收咧，未嘗唔係好事。

　　第一場四班1200米。「永順益」今季多戰無功，總共7場，冇場跑得好，連四五名亦未跑過，假假哋上季贏過四班賽，而曾經在五十幾分仲跑到入前列，望望目前已減至40分，真係減到過晒籠。當然，呢匹馬季內真係幾沉，唔知復出跑得出幾多成水準，不過，唞到夠，喺體力方面贏晒對手，就算配搭唔係好似樣，賠率有得分，我都會博一博。

　　第五場四班1650米。「業盛於和」今季曾經三度上名，當中輸過畀啲唔錯嘅馬，例如「永勝多」、「勝利福星」、「藍雪山」等，冇理由四班冇得贏。呢次由田草返回谷中作賽，對手大多冇料到，而佢贏在路程經驗及排檔，用嚟揸膽應該穩陣。

　　第八場三班1650米。尾場賽事真係幾亂，冇邊匹馬予人十足信心，所以，博一匹「醉喜」。今次係轉到葉廐初出，此馬季內冇乜點用過，面對一批搏到殘對手，點都秤高啲，何況，大前仗才於此程上名，阿航揀番此程，唔會冇心出手。