法國U20強勢狙擊烏茲別克

猪拉多纳

上屆世青盃冇一隊亞洲球隊可以打入8強，點知今屆就一口氣搶咗3個席位，當中伊拉克對南韓仲保證咗今屆世青盃4強肯定出現一支亞洲隊伍。至於烏茲別克就冇咁好彩，今晚8強要喺陣容不整下硬撼實力分子法國隊，大敗在所難免，2.05倍「讓球主勝」捧得過。

（TVB網絡電視01頻道及now801台周六晚11:00直播）
烏茲U20兩後防主力停賽

法國2年前喺4強輸畀葡萄牙出局，今屆矢志捲土重來，佢哋喺16強4:1大破東道主土耳其，展現爭標實力。新球季會披上阿仙奴戰衣嘅射手耶耶辛洛高上場再有進帳，今屆賽事已累積3個入球，配合愈戰愈勇嘅西維爾中場干度比亞，同埋祖雲達斯新星保羅普巴喺中場派牌，後防又有烏迪迪復出坐鎮穩住軍心，烏茲別克今晚都係捱打居多，門將艾文洛夫肯定有排忙。

烏茲別克上仗淘汰希臘晉級，可惜賠上兩大後防主力，守將耶達舒奧夫同拉卡文洛夫齊齊停賽，中場伊斯簡達洛夫又因傷缺陣，大大影響球隊攻守力。加上呢次係佢哋首次殺入淘汰賽階段，連大賽經驗都輸埋憑咩同法蘭西軍團鬥？