山葉 櫻花喪攻做「大」騷

猪拉多纳

日職同時段3場直播

日職喺洲際國家盃收工後重開，今日同時段仲有3場直播畀大家歎，當中以磐田山葉主場對大阪櫻花最好路，因為磐田有以前川崎前鋒嘅喪攻教頭關塚隆正式上任領軍，兩屆日職「得點王」前田遼一（圖）翻生有望，捧1.75倍入球大！

（有線64及203周六晚6:00直播）
關塚上任有助前田翻生

以前川崎前鋒嘅有前冇後喪攻打法，相信有睇開日職嘅朋友都記得。雖然我唔明，點解關塚隆後尾帶領日本奧運隊躋身倫奧4強，都有球迷鬧佢唔掂，但無論點，關塚監督專登等休戰完先領軍，當然係想有時間砌好隊波打響頭炮，信佢要玩大佢。

事實上，開季到依家得兩個聯賽入球嘅前田遼一，曾經連續兩屆成為日職神射手，依家有關塚監督為佢度身訂造戰術，相信好易撻番着。另一方面，櫻花喺日聯盃出局後，可以專心搏聯賽，佢哋嘅新王牌柿谷曜一朗，睇怕會同前田遼一鬥入波，唔驚冇波入！