主場出擊夠鑊氣 美國「-2」好茲味

猪拉多纳

美洲金盃上演C組賽事，奪標熱門美國對世界排名過百球隊伯利茲。其實每屆美洲金盃美國都好受重視，事關自1991年起美國都有份舉辦或合辦美洲金盃；既有主場之利，難怪美國近四屆都能打入決賽。主辦國首場分組賽肯定會出盡全力求勝，無謂令主場球迷失望，今場兩隊強弱分明，就算「讓球主客和」美國讓到兩球，巨高亦認為不妨大膽選取「讓球主勝」。

（有線61及201台周三早上11時直播）
伯利茲好打有限

美國領隊奇連士文雖未有喺今屆美洲金盃點選艾迪杜里、丹普西及米高巴特利等外流球員入伍，但有過百頂喼帽嘅骨幹球員比士利及銀河球星當路雲今次齊齊入選，加上曾効力過紐卡素、AC米蘭、士砵亭及馬拉加嘅後衞安恩胡亦會以「老大哥」身份鎮守後防，美國競爭力仍然處於高水平。論到近況美國一樣唔輸蝕，連同世界盃外圍賽及熱身賽，美國已經錄得五連勝佳績，剛賽對危地馬拉更大勝六比○，球員信心肯定大幅提升，今次主場對住弱隊伯利茲應可予取予攜，大勝一仗。

伯利茲球員名不見經傳，絕大部分國家隊成員都只係効力當地球會，論質素一定唔夠美國咁好，而且佢哋從來都未見過大場面，去到美國比賽肯定腳仔軟，一於吼實1.65倍「讓球主勝」。