皇者拍檔最後勝利

猪拉多纳

　　跑完今次夜馬，終於可以唞唞。季尾最後幾期賽事，真係好密集，日馬次次11場，呢期仲整夠9場　！　未刨、未賭，淨係睇到個排位表都飽。有時覺得係咪需要「質」到啲場次爆晒先為之好，我唔多清楚，但個人真係唔多頂得住。最後，在此預祝馬友們取得最後勝利。

　　第四場四班1650米。「皇帝諭令」六、七月跑完又跑，季尾仲跑咁多，蔡神仙博乜？無非為贏馬。而在田草搏極贏唔到，轉轉場，希望遇到較弱對手，呢個策略好合理。而隻馬雖然未跑谷草，早有谷閘經驗，證明練馬師唔係冇鋪排。此外，睇隻馬上場加了眼罩早段落腳冇咁慢，直路亦衝得比前勁，證明有進步，有力打開勝門。

　　第五場四班1000米。「權駿精英」以前口勁唔好、性情急到瀨，但時至今日，多跑之後，愈來愈有改善，四十幾分唔會冇馬贏，未必要等到落五班。由於今次排在5檔，同場快馬全部排晒佢外側，只要早段把握得好，貼欄自行領放，應該可以一放到底取勝。

　　第九場三班1650米。「皇者拍檔」近仗加眼罩及綁脷，演出穩得好多，但其實呢匹馬唔係短途材料，中距離才是擅長項目。今次終於轉爭一哩，預期比起角逐1200米更叻，希望11檔對發揮唔好太大影響，就有勝望，同時，為方仔埋齋，取得今季最後1W。