聖保羅換帥士氣差 巴希亞「讓客」值博

猪拉多纳

聽朝巴甲獨腳戲，聖保羅喺主場迎戰巴希亞，卡爾萬選擇巴希亞3.25倍「讓客」。

聖保羅雖為傳統勁旅，但今季踢落冇厘霸氣，已連續5場正式比賽冇贏過。由於戰績衰到貼地，聖保羅教頭尼利法蘭高亦喺日前落鑊，目前暫由助教頂檔，加上丹尼遜與威靈頓艾巴里斯杜呢對防中坐波監，今場難以睇好。

另一邊廂嘅巴希亞，除咗防中迪奧尼斯刑滿復出，狀態唔錯嘅費蘭達奧近兩場作客都有波入，馬昆奴斯、安達臣泰列斯卡等進攻好手亦能候命，今場作客並非任由宰割。