烏拉圭 爭盃有法

猪拉多纳

後勁強 變招高

假土耳其舉行嘅世青盃今晚爆發王者之戰，由法國U20和烏拉圭U20爭逐冠軍寶座。論戰績及整體發揮，法國無疑係稍勝一籌，不過嚟到決賽場合乜事都有可能發生，如果計後勁及變陣招數，烏拉圭絕對有過之而無不及，法國讓半一太多，波童寧揀下盤。

（無綫翡翠台及now 801周日凌晨2時直播）

烏拉圭今屆喺變陣方面有好多選擇，上場就靠三名後備入替嘅球員迪亞高洛蘭、阿雲拿迪及干沙路布安奴合力炮製士哥，完場前三分鐘逼和伊拉克，最終射贏十二碼打入今晚嘅決賽。
法國防線不穩讓唔起

其中波童最欣賞係身穿20號球衣嘅高大中鋒阿雲拿迪，呢名身高1米96嘅前鋒雖然上陣時間唔多，不過次次都交足功課，繼八強對西班牙頂入奠勝入球後，上次對伊拉克亦係靠佢set個靚波畀隊友扳平，連同十六強由尼高拉斯盧比斯完場前六分鐘射入十二碼淘汰尼日利亞，烏拉圭連續三場都喺比賽末段建功從而淘汰對手，嗰份永不放棄嘅後勁絕對唔可以睇小。

法國踏入淘汰賽後連贏三場，不過有睇上場對加納嘅朋友應該認同，法國喺下半場被加納追和後一度方寸大亂，如非門將艾路拿屢救險球，法國未必可以贏得咁順利，而且正選守衞烏姆迪迪上場領紅牌被逐，今仗停賽，令防線出現隱憂，法國讓半一太辣，下盤博得過。

頭場季軍戰，加納U20鬥伊拉克U20，通常季軍戰大家會踢得較開放，加納今屆六場比賽有五場開大，而且射手艾舒夫亞現跟葡萄牙布馬及西班牙謝斯洛迪古斯以五球並列射手榜一哥，只要今仗有入波就可獨得神射手寶座，捧大啱數。（無綫明珠台及now 801周六晚11時直播）