兵工廠打越戰 火力全開大炒格

猪拉多纳

阿仙奴亞洲之旅第2站作客鬥越南國家隊，兵工廠上仗大炒印尼明星隊7比0，備戰態度認真，皆因會方終於肯大破慳囊，準備用7,000萬鎊增兵，力爭結束8年錦標荒。領隊雲格隨時進行大換血，所以陣中球員戰戰兢兢，趁熱身賽大踢身價波，以免成為被清洗對象。相信一眾「槍手」會繼續打真軍，炒得起世界排名跌至145位嘅越南，就算讓兩球都要捧「讓球客勝」。

（亞視本港台周三晚8時直播）
為保飯碗加倍肉緊

阿仙奴人腳質素平均，換句話講冇乜邊位球員擁有「免死金牌」，一旦雲格出手買人，唔少人可能失去正選，甚至被掃走。難怪今次亞洲之旅人人為保飯碗，落場都特別落力，禾確特、普多斯基、基奧特等常規正選上仗亦不敢怠慢，一齊數胡。小將艾克邦、伊斯菲特及基斯奧臣就更加肉緊博上位。兵工廠已經着晒火，同曼市雙雄Hea踢輸波形成強烈對比。
越南排名僅高香港3位

越南近年足球水準不進反退，更不時爆出假波醜聞，足運飽受摧殘，世界排名跌至145位，僅高過香港3位，3月亞洲盃外圍賽作客0比1輸畀港隊，班波有幾多斤両可想而知。

越南今次大軍名單有一半屬於24歲或以下年輕球員，經驗及實力都無法同阿仙奴相提並論，今仗目的純粹為學嘢，難免要交「學費」。