辛特侯遜誓響頭炮

猪拉多纳

逃出降班魔掌 增兵發圍

德乙搶閘開鑼今晚上演三場，辛特侯遜主場對阿倫值得留意。辛特侯遜上季排尾二本應降班，但最終僥倖留低，大難不死，發奮圖強大事增兵，相信會有一番新景象，首仗出擊更希望打響頭炮。反觀阿倫流失主力，提防表現走樣，平手盤Mic少揀辛特侯遜。

（有線64及203台周六凌晨零時30分直播）

辛特侯遜本應降班，但由於杜伊斯堡財政未符合要求，被禠奪參賽權，令辛軍得以留級補上。見過鬼自然怕黑，辛特侯遜絕對唔想重蹈上季覆轍，今夏落重本引入十多位新兵，包括曾効力慕遜加柏嘅中場馬菲亞斯森馬文，從緬恩斯來投嘅後衞沙巴夫尼克，以及前哈化柏林中場馬雲洛爾，整體實力大為提升。辛特侯遜現時眾志成城，季初應該會有一番作為。
阿倫殘兵作客難頂

阿倫上季雖然位居第九位，但季前有次席射手馬田杜治、後衞添基斯達及中場馬高賀拿離隊，亦冇補充兵力，攻守能力皆受削弱。屋漏偏逢連夜雨，上季首席射手列治列達有傷在身，今仗上陣成疑，另一位前鋒米高卡魯斯要坐跨季波監，令阿倫更加惡唔出樣，平手盤梗係捧番辛特侯遜。

另外，聖保利主場對1860慕尼黑，兩軍近期熱身賽表現突出，聖保利擊敗過土耳其勁旅比錫達斯，1860慕尼黑則贏埋德甲利華古遜，雙方已操弗狀態，可望迅速入局駁火，呢場捧入球大。