東亞盃女足 南北韓破冰最緊要和氣

猪拉多纳

今日東亞盃女足爆發韓戰，南韓女足坐鎮主場迎擊北韓，兩韓關係緊張，今次被視為破冰之戰，以足球搞好外交，計級數上年踢過倫敦奧運嘅北韓較高，但南韓佔得地利，呢場五五波，蘇豪捧和波！（now 633及635周日下午5時15分直播）

足球理論上應該同政治分開，但當見到南、北韓對決，好難唔令人聯想到政治議題。北韓今次帶咗36人代表團出征，包括21名球員，當中唔少女將都好後生，兩大進攻主力崔美景同尹鉉喜上年都有參戰奧運，有晒大賽經驗，佢哋出名紀律好，而且體力勁，仍屬今屆實力分子。
主隊靠池笑然孭飛

東道主南韓女足亦嚴陣以待，召入唯一外流射手池笑然，呢位球星現時効力日本超級勁旅INAC神戶，平時同澤穗希及川澄奈穗美等日本國腳拍住上，級數甚高，將成球隊進攻重心。南韓實力稍遜，但有主場之利，令今戰形勢好接近，結合呢次獨有嘅破冰氣氛，和波大家開心值得一試。