水手孖紅魔做大騷賀壽

猪拉多纳

適逢贊助商80周年慶典

曼聯亞洲之行第3擊今晚爆發，「紅魔鬼」會去到日產球場同日職勁旅橫濱水手踢表演賽，佢哋今仗有「地膽」香川真司歸隊孭飛，中前場嘅韋碧克同新星連格又鬼咁Fit，對住要幫日產汽車慶祝80周年「牛一」嘅水手肯定會做番場「大」騷娛賓。

（now632台、廣東體育周二晚6:20直播）

踩蕉皮輸完畀泰國明星隊之後，曼聯上星期六即刻大炒澳職明星隊五個一皮挽面子，韋碧克重拾射門鞋省兩粒之餘，中場新星連格亦都梅開二度，呢兩位生牯仔今仗鬥水手料會繼續擔正，腳風咁順隨時又再嚟料。據曼聯官網報道，除咗中場費查要養傷到開季，翼鋒艾舒利楊格同後衞基斯史摩寧已經克服傷患，連同早排踢完洲際盃嘅香川真司齊齊歸隊，意味住新帥莫耶斯又多3位球員調動。返到自己地頭嘅香川真司喺鄉親父老面前獻技，肯定想數番十胡攞威，戰意唔使懷疑喎！
靚女主播打氣

有曼聯同香川真司到訪，日本傳媒話今場表演賽啲飛都好銷得，預計日產球場今晚會座無虛席，據講VIP靚位波飛仲賣到成3萬日圓（約2,329港元）一張兼有紀念品送番畀球迷，水手賽前仲搵嚟《TBS》電視台靚女主播枡田繪理奈打氣造勢添，睇得出呢支日職勁旅花盡心思想搞大佢。
馬昆奴斯狀態一流

水手自J League成軍以嚟一直獲日產汽車呢條大水喉射住，適逢年底就係車廠80周年生日，水手亦都特別推出咗件「日產80周年」特別版波衫鬥曼聯，照計全隊上下都想好好睇睇，做番場Good Show送畀球迷。球隊近期喺日職連贏松鼠同紅鑽兩大勁旅，35歲隊長中村俊輔寶刀未老，37歲射手馬昆奴斯仲連續兩場日職有波入添，要撕破「紅魔鬼」防線唔係冇機。