國足膽大打虎

猪拉多纳

中韓對戰 男女隊分途出擊

正在南韓舉行嘅東亞錦標賽，今日上演中韓男女足雙料大戰，「男子組」方面，國足上仗落後兩球劣勢下逼和日本3比3，一洗近期恥辱，證明換帥屬正確決定，球隊已打出鬥心，當然要再接再厲，以悅目足球省靚招牌。東道主「太極虎」南韓首仗失分，求勝心切應會採取主攻，Mic少捧入球大。

（now 633及635周三晚7時直播）

中國隊上仗打和日本當正贏波一樣，事關球隊喺前主帥甘馬曹帶領下，跌入黑暗時間，尤其係上月1比5慘敗畀泰國「青年軍」，堪稱國恥。中國足協炒咗甘馬曹，改由傅博暫時領軍，戰術及技術層面上未必有大進步，但球員知恥近乎勇，鬥心明顯遠勝之前，贏得球迷及傳媒肯定，可見國足只要肯落力比賽，一樣可以踢好波。中國隊難得挽回面子，今仗應會繼續打出拚勁，即使贏唔到，亦要取得入球，以正視聽。

南韓以本土及喺日職搵食嘅球員出戰，實力難免打折扣，但佢哋畢竟係主辦國，冇理由踢兩場都開唔到齋咁失威。事實上，南韓一向視中國隊為「私房菜」，對往績佔優，更加有信心主攻求勝，國足防守麻麻，難保不失，預料今仗應不乏入波鏡頭。
中國女足積弱難偷雞

「女子組」方面，南韓女足近年進步神速，上仗先開紀錄下輸畀北韓實屬可惜，今仗遇上積弱已久嘅中國女足，可望打開勝利之門。

（now 633及635周三下午4時15分直播）