熱刺火併新特蘭曼城超班炸南華

猪拉多纳

英超星戰大球場

2013巴克萊亞洲錦標賽今晚在大球場爆發，3支星光熠熠的英超勁旅曼城、熱刺及新特蘭，聯同港甲冠軍南華捉對廝殺，爭入周六的決賽，觀星指數爆晒燈！頭場熱刺硬撼新特蘭，超級巨星加里夫巴利因傷缺陣，令一向靠佢食胡嘅熱刺頓變冇牙老虎，面對勤操猛練嘅新特蘭，隨時遭滑鐵盧；尾場南華主場迎戰勁旅曼城，兩軍咁啱都換咗新帥，但曼城球星如雲，耶耶托尼、拿斯尼、迪斯高等級數都贏幾條街，加上已歸隊嘅領隊比歷連尼剛丁母憂，眾將都想以一場勝仗作為慰問，相信南華即使死守都難逃大敗。
加里夫巴利因傷缺陣

頭場熱刺先鬥新特蘭，計牌面熱刺高啲，但該隊一向靠晒王牌加里夫巴利單天保至尊，但呢位威爾斯球星今仗因傷肯定缺陣，況且佢哋之前熱身賽表現麻麻，相反新特蘭喺「狂人」教頭迪肯尼奧帶領下備戰認真，來港後勤操猛練逐漸上力，趁加里夫巴利唔出得，仲唔拚盡爭勝入決賽咩？

（now 621、632及香港電台數碼35台周三晚6時直播）
狂人加操谷狀態

熱刺隊中王牌加里夫巴利無疑係焦點，但領隊保亞斯喺昨日記招傳來噩耗，話呢位威爾斯國腳仍有傷，為安全起見今晚唔會派佢落場，但希望可趕及喺周六嘅決賽日披甲。保帥強調新特蘭唔易應付，上季聯賽兩戰對手都贏得驚險，其中煞科日主場迎戰「黑貓」之役狂攻無果，直至末段先靠加里夫巴利神來之筆嘅遠射奠勝。

其實昨日巴利仔都有乘大軍巴士到大球場，不過就冇落場同隊友操練，睇嚟係喺更衣室療傷，令在場球迷非常失望。熱刺近況亦麻麻，之前兩場熱身賽對史雲頓及高車士打都係和波，球員明顯未操起。新特蘭比熱刺早一日抵港，但「狂人」主帥迪肯尼奧備戰態度相當認真，到埗即練操兩粒鐘，前日更一日操兩課，個個練到身水身汗似足軍訓，睇得出「狂人」想盡快谷起球員嘅體能。
黑貓新兵有料到

雖然新特蘭新兵較多，磨合需時，但迪肯尼奧強調會在今次賽事全力搏殺，新季目標唔單止係護級，希望能踢出悅目足球。講到同鄉新兵基亞卓尼利，迪帥大讚佢係世上最佳球員之一，未來會以呢位意國新星做重心，而呢位中場球員可任中路及邊路位置，活力十足，能為硬橋硬馬嘅「黑貓」帶來創造力，加上另一新兵艾迪杜里質素唔曳。估計「黑貓」可憑較弗狀態打低熱刺，躋身周六決賽爭盃。
賽事資料

地點：香港大球場

賽事：熱刺Vs新特蘭（晚上6時）、曼城Vs南華（晚上8時30分）

票價：$500、$350、$300、$250及$150（學生及長者特惠票）

註：尚餘少量門票於大球場發售