喜伯年無態咬唔入馬模

猪拉多纳

歐霸盃外圍賽今晚戰火重燃，首回合輸0:2嘅蘇超球隊喜伯年回師主場同瑞超「一哥」馬模再決高下，力求收復失地殺入第3圈。講就容易，雙方首仗交手喜伯年完全處於下風，唔係門將賓威廉士有超水準演出嘅話，真係吞多幾隻蛋都似，今晚焗攻隨時輸多鑊勁，一於捧馬模要1.9倍客W。（開賽時間：周五凌晨2:45）

翼鋒阿歷士夏里斯傷埋
呢個Match Up邊隊晉級第3圈就會面對英超隊伍史雲斯，首回合造訪瑞典嘅喜伯年，全場波都冇乜攻勢，相反仲畀馬模搞到後防風聲鶴唳，如果唔係門將賓威廉士幾次「神救」馬奴斯艾歷臣、蘭泰同謝路安夏馬特嘅攻門，喜伯年邊止輸得兩粒咁少吖，呢場波亦都印證雙方實力差距有幾遠。況且佢哋陣中最好波嗰件翼鋒阿歷士夏里斯大腿仲有傷，前線要靠連昆士柏流浪都唔用嘅洛雲維尼攻堅，咁嘅人腳唔係諗住有運行啩？

蘇超未開咧，喜伯年未入局好正常，反觀踢咗16輪聯賽兼排喺瑞超榜首嘅馬模，狀態就比喜伯年好得多。賽前馬模教頭諾寧仲收到好消息，就係後防大將希蘭達已經克服膝傷復操，有埋呢支定海神針鎮守後防，喜伯年想咬得入馬模都幾難，隨時輸多鑊都似！