廠仔亞洲着火繼續「W」

猪拉多纳

紅鑽主力去晒踢「太公波」
阿仙奴今夏亞洲之行夠晒正氣，繼印尼、越南兩站怒炒對手，日前出戰舊東家名古屋鯨魚都冇留手，今晚踏入最終站面對浦和紅鑽，相信會貫徹進攻本色。相反紅鑽多名主將替日本征戰東亞錦標賽，難阻兵工廠為行程畫上完美句號，2倍「讓客」咪錯過。

（亞視本港台周五晚6:30直播）

日本國腳征戰東亞錦
阿仙奴喺亞洲勢頭咁勁，頭號功臣當然係3場攻入6球嘅基奧特，配合埋表現生龍活虎嘅禾確特邊路快放，以及面對鄉親父老肯定搏盡嘅宮市亮，強大火力唔講得笑。再者中場阿歷士張伯倫同門將施捷斯尼有望趕及復出，進一步鞏固攻守能力，要維持之前幾站Sharp醒表現唔難。

今場係阿仙奴亞洲之行最後一站，同時亦係埼玉盃戲碼，不過「縣代表」浦和紅鑽想發威怕且好難，事關中場鈴木啟太因為拉傷大腿肌肉，今場肯定缺陣外，進攻主力原口元氣、防線核心槙野智章同森協良太又幫緊日本踢緊東亞錦標賽，對於習慣排3人防線嘅紅鑽，霎時間冇咗兩件後防主力，點頂得住來勢洶洶嘅阿仙奴。