多蒙特主場難擋拜仁

猪拉多纳

新兵先後受傷病折磨
德甲兩星期後至開鑼，不過今晚先上演超級盃，上屆聯賽同歐聯亞軍多蒙特主場迎戰「三冠王」拜仁慕尼黑，今場比賽不設加時，賽和即互射12碼決勝。多蒙特主場戰鬥力同往績都好硬淨，但賽前受到傷病問題困擾，面對來勢洶洶嘅拜仁睇低一線，推介1.83倍拜仁客勝。

（有線61及201台周日凌晨2時30分直播）

德國超級盃今屆已經進行到第18屆，拜仁過去5奪錦標係大贏家，多蒙特同雲達不來梅各攞過4次冠軍緊隨其後，除咗呢3隊，其餘球隊最叻只贏過1屆冠軍，呢個盃過去只被視為季前熱身賽，但近季愈嚟愈受重視，今屆全球有195個國家同地區直播，破晒歷來紀錄，雙方賽前都聲言排出最強陣容爭盃。

拜仁季前準備足，熱身賽所向無敵，啱啱至喺漢尼斯盃輕描淡寫贏咗巴塞隆拿，雖然話巴塞殘陣出擊，但拜仁下半場先後換晒所有球員，而且明顯未有刻意緊迫對手，根本有餘未盡。拜仁喺連串熱身賽中不斷試陣，其中隊長拿姆改踢中場同前線用無鋒陣都令各界議論紛紛，不過新帥哥迪奧拿今仗賽前表示，今場會用番主導嘅「4141」陣式，拿姆亦會踢番佢最擅長嘅右閘位置，全隊上下對保持連勝紀錄充滿信心。

吼埋3.7倍「讓球和」
多蒙特季前熱身賽冇拜仁咁Sharp，較早前電訊盃輸過畀慕遜加柏只得季軍，馬里奧葛斯離隊令佢哋失去組織核心，原本取代佢嘅高價新兵亞美尼亞國腳米希達利恩又未開咧先傷，今仗賽前仲傳出大營受到流感侵襲，巴拉斯塞高斯基同新加盟嘅射手奧巴美揚都中咗招缺練，中場隨時要用小將莊拿斯荷夫曼頂檔。不過多蒙特主場始終硬淨，而拜仁近3次贏多蒙特都只係小勝1球，包括上屆德國超級盃同歐聯決賽，今場客軍都係小勝居多，可以博埋3.7倍嘅「讓球和」。