北韓志切爭標搶W

猪拉多纳

中國姑娘輕鬆歎韓燒
今日上演女子東亞錦標賽最後一輪賽事，頭場北韓女足大戰中國女足，由於兩國近期關係緊張，令呢場波更受關注。北韓上仗力戰逼和世界冠軍日本女足，表現贏盡掌聲，若想奪標今仗必拚盡爭勝，斯維捧主Ｗ。

（now 633及635周六下午4時15分直播）

雖然政治與足球不應混為一談，但近期中國與北韓的關係轉趨冷淡，不再像以往般唇齒相依，令呢場比賽變得矚目。賽前中國全隊去咗食韓燒，不再留在酒店食自助餐，成班姑娘好似放鬆晒，而上仗一箭定江山絕殺南韓女足的李影，賽後被送去醫院檢驗，初部證實韌帶撕裂，今仗肯定作壁上觀。

相反，北韓備戰態度積極，上仗力戰逼和世界冠軍日本，表現不落下風。睇番形勢，依家北韓與日本同分，但得失球稍遜排第二，若果佢哋想捧盃，向該國領導人金正恩致敬，最好方法就係擊敗中國，決心十足之下，主勝捧得過。

日本圖冧莊必斬南韓
尾場南韓女足硬撼日本女足，前者頭兩場輸晒，實力明顯未夠班。日本志切爭取東亞錦標賽三連冠，由於頭場北韓好大機會贏中國，因此「大和撫子」面對南韓唔會留手，簡單要個客勝。

（now 633及635周六晚7時直播）