德國攞威爭6連霸

猪拉多纳

假瑞典舉行嘅女子歐洲國家盃今晚上演終極決賽，德國女足鬥挪威女足，德國過去三次於歐國盃決賽面對挪威都能贏波捧盃，有格食格味道，而且挪威於準決賽同丹麥鬥足百二分鐘已經殘殘哋，一於撐德國贏波締造六連霸偉業。

（now 633及635周日晚10時直播）

德國、挪威傳統以來都係女子歐國盃冠軍常客，過去十屆除咗瑞典贏過首屆錦標，對上9次都係由呢兩隊包辦冠軍，當中德國更已連贏五屆，今屆再贏將成六連霸。兩軍今屆曾在分組賽碰頭，當時挪威以1比0擊敗德國，不過挪威史上三次於歐國盃決賽面對德國都係落敗一方，來到爭標關鍵時刻，呢個心理關口隨時成為勝負轉捩點。

挪威抖少日蝕章
德國今屆五戰有四場不失，唯一失波就係喺分組賽輸畀挪威一役，防線予人穩健信心。挪威四強面對丹麥雖然早早領先，但之後被對手住砌，去到加時部分球員腳軟，體力消耗極大，而且佢哋比德國少一日休息，鬥到末段隨時後勁不繼，德國可望繼05年決賽後再次擊敗挪威捧盃。