美國「－１」手到拿來

猪拉多纳

東道主全勝轟19粒勇闖決賽
今屆美洲金盃決賽將由主辦國美國與巴拿馬爭奪冠軍。美國近兩屆金盃都輸畀墨西哥屈居亞軍，如今死敵墨西哥已經出局，對美國爭盃可謂毫無障礙。縱然美國領隊奇連士文於四強戰領紅牌，今次唔能夠坐鎮指揮，但相信影響唔大，今場大膽多少選擇「讓球主勝」。

（有線61、64及201台周一凌晨4時直播）

美國於今屆賽事以全勝姿態打入決賽，淘汰賽階段更盡顯霸氣，先喺八強以5比1大炒薩爾瓦多，再喺四強以3比1贏洪都拉斯，連分組賽在內合共轟入19球只失4球，球隊大可食住個勢砌低巴拿馬攞埋冠軍。而且美國本身有主場之利，加上近三次對賽都贏巴拿馬，上述兩點有助投X信心。

巴拿馬欠大賽經驗
唔好忘記美國球星當路雲爭緊神射手，今場決賽一定會拚盡。其實當路雲都已經31歲，踢多幾年就要掛靴，相信佢會好好把握機會爭取功名，尤其美洲金盃屬中北美洲最具代表性錦標，當路雲更加唔會放過。

巴拿馬喺今屆美洲金盃都算叻仔，於四強爆冷踢走墨西哥，不過當日巴拿馬搏得好盡，球員難以喺短時間內回氣。再講，巴拿馬球員大賽經驗不足，去到決賽隨時會怯場，肯定影響發輝。今場兩隊實力差距都幾大，揀選賠率較高嘅「讓球主勝」好合理。