美國爭金盃殺得「勝」起

猪拉多纳

連續兩屆屈居美洲金盃亞軍嘅美國，今屆大發神威，5場喪轟19球殺入決賽，火力咁猛都咪話唔嚇親對手。周一凌晨佢哋就喺一班鄉親父老面前同巴拿馬爭冠軍，肯定冇留手，2.35倍「讓球主勝」值得一試。

（有線61、64、201、203周一凌晨4:00直播）

巴拿馬入決賽未受考驗
美國賽前取得10連勝，成班球員狀態弗到漏，尤其係射手當路雲，呢位MVP大熱門為球隊貢獻咗5個入球同7次助攻。上場又用兩射一傳踢走洪都拉斯，只要有佢助陣，入波真係「依絲執」。而且呢位前鋒上場踢咗70分鐘就被換走，擺明留力今場搏殺，更加唔擔心佢會冇貨交。除咗佢之外，美國仲有8位球員喺金盃入過波，咁多得分點，你叫巴拿馬守得邊個？

巴拿馬上仗淘汰墨西哥，睇落好似好醒，不過咪忘記墨西哥只係出副選參戰，何況其餘對手古巴、加拿大、馬提尼克實力一般，換言之巴拿馬根本未受過太大考驗。睇番佢哋上個月喺世盃外圍賽作客美國同哥斯達黎加，就即刻輸波「現形」，相信今場都好難頂得住一班「花旗兵」。