C朗顯身價 皇馬炒銀河

猪拉多纳

成功扭計 做最高薪球員！
國際冠軍盃聽朝繼續喺美國開戰，皇家馬德里喺鳳凰城對洛杉磯銀河，讓兩球照捧2.15倍「讓球主勝」。經過一輪扭計，尋日皇馬會長皮里茲終於露口風，打算令C朗成為全球最高薪足球員，意味準備大幅加薪氹佢留隊，只要佢肯搏，肯定大把入波睇，吼實「讓球主勝」！

（now632台周五早上10:30直播）

其實以曼聯老細格拉沙嘅個性，又邊似肯拎咁多錢回購C朗，個人認為，傳聞話C朗回歸奧脫福球場，一切都係佢經理人嘅把戲，目的係幫C朗加人工分錢，依家好啦，尋日皇馬會長皮里茲終於開口，佢話希望C朗喺巴拿貝踢到退役，承認計劃令佢成為全球最高薪球員，等佢安心續約，勁過年薪2,000萬歐元嘅安治球星伊度奧！

當路雲打完金盃隨時腳軟
另外，皇馬新教練安察洛堤上任後，暫時取得2勝1和，由於安察洛堤仲未決定正選陣容，今場皇馬球員對住唔夠班嘅銀河，有得落場嘅難免雙眼發光搶錢咁搶，尤其係攻擊線上，除咗C朗好難講邊個係必然正選，假如加里夫巴利真係加盟，其他人更加係有排震，如果唔把握機會騷哥利，隨時要長坐冷板，點會唔搏呀？

另一方面，銀河有當路雲同後衞奧馬干沙利斯歸隊，但佢哋剛啱為美國重奪美洲金盃，體能方面可能有問題，呢場會踢幾多時間，冇人知，前鋒羅比堅尼最近更加因傷缺陣，就算今場可能復出，落到場都未必惡得出樣，剩低門將古迪仙尼，隨時成為皇馬球員嘅箭靶，好難相信美職球隊能夠擋得住「銀河艦隊」。