史雲斯操到弗打殘馬模

猪拉多纳

今晚歐霸盃第3圈外圍賽首回合，史雲斯主場迎戰馬模，2.2倍「讓主」博得過。相隔逾廿年重返歐洲賽場，史雲斯嚴陣以待，季前以破球會轉會費紀錄羅致韋費特邦尼等多名新援，並且提前開操同踢熱身賽提升球員狀態，今場對住次一級嘅馬模，肯定趁主場搶定幾粒打底。 （開賽時間：周五凌晨2:45）

馬模防線天殘地缺
史雲斯喺7月踢咗7場熱身賽，全部作客贏晒不特止，埋單攻入28球更盡顯驚人火力，日前面對雷丁作最後閱兵，除首席射手米捷先拔頭籌，上季喺荷甲踢30場入31球嘅韋費特邦尼更梅開二度，足證狀態弗爆。再者「天鵝」留住防線核心艾殊利威廉斯後，再從利物浦簽入新星舒維爾，配合寄誠庸、尼敦戴亞等原有班底，表現確實令人期待。

馬模上圈歐霸盃雖然大勝晉級，不過對手喜伯年踢落明顯冇態之餘，次回合落後焗攻遇着隊長兼中堅麥柏基早段傷出，至會潰敗收場。再睇番馬模第1圈作客杜希達，佢哋喺對手有中場核心被逐下，都把握唔到優勢贏波，證明表現並非咁標青。況且馬迪亞斯干查與希蘭達呢對後防拍檔受傷缺陣，今場防線天殘地缺，點頂史雲斯猛烈攻勢？