波圖前鋒掛牌大陣仗

猪拉多纳

強戰拿玻里當睇辦騷
由英超阿仙奴主辦嘅酋長盃進行最後一輪賽事，頭場為意甲拿玻里鬥葡超波圖。今場兩支球隊都會盡全力拚搏求勝，入球數字偏高可以預期，巨高大盤先揀。

（now 621周日晚9時直播）

葡超波圖其實係一間超級經理人公司，好多球壇奀星去到波圖就變成大紅人，球員價值可以喺短短一至兩年間暴升，侯克及法卡奧就係最佳例子。而今年夏天波圖已經將哥倫比亞國腳占士洛迪古斯賣到「暴發戶」摩納哥，呢支葡萄牙班霸想趁轉會市場仲有一個月時間，賣埋前鋒積臣馬天尼斯。

反正呢位哥倫比亞射手近年夠晒吃香，波圖梗係借酋長盃呢個大舞台，為積臣馬天尼斯做足宣傳工作。大家都知阿仙奴好想買番個前鋒，如果積臣馬天尼斯喺酋長盃踢得好，話唔定會畀阿仙奴領雲格睇中兼即時問價，故此波圖全軍肯定會全力應戰，造就積臣馬天尼斯成為酋長盃之星。

拿玻里擴軍之後，球員正需要比賽進行磨合，教練賓尼迪斯亦會透過比賽了解球員進度，為新球季排陣作好準備，有理由相信拿玻里會踢得比以往更加開放，多入球都好正常。今場焦點球星希古恩極有機會以正選身份落場，賓帥話佢有能力爭奪任何聯賽嘅神射手喎，球迷不妨留意吓。

阿仙奴加拉鬥攻
酋長盃最後一場由阿仙奴主場對加拉塔沙雷，客隊有唔少球星在陣比如杜奧巴、史奈達、菲臘比美路以及倒戈球員伊保爾，對住「兵工廠」都冇有怕。阿仙奴喺主場球迷面前唔可以失威，肯定會主動進攻求勝，今場再捧大盤。

（now 621周日晚11時20分直播）