飛腳踩冧岡山熱W照捧

猪拉多纳

主場滿座打高兩皮波？講就得！岡山綠雉今日响（日）9日乙迎戰來訪嘅大阪飛腳，雖則個主場坐到爆晒，佔晒地利人和，但係實力差人成班波，今場都係玩1.53倍客勝算嘞。（開賽時間：周日晚6:00）

岡山唔夠班出埋靚女PR都冇符
岡山落足本催谷呢場波嘅票房，唔單只製作咗条仙石廉（岡山中場）Vs遠藤保仁（飛腳中場）嘅限量版「7號對戰」頸巾，用最抵價2,000日圓發售，仲畀入場前20名觀眾落草地影相留念。影相有乜特別呀？如果你唔鍾意靚女的確冇乜特別，因為到時可以同岡山個PR桃瀨美咲合照喎，好多Fans都係為咁而撲飛咋。

主場球迷多，岡山打起波嚟自然醒神啲。問題係勢均力敵嘅波就話氣勢緊要啫，飛腳人強馬壯，放喺日職都屬於爭霸分子，岡山呢啲日乙級數，靠個勇字都好難有作為。

無可否認，飛腳呢班波非常蠱惑，你諗住佢Win梗，佢就衰畀你睇。正因為咁，佢哋已經兩場作客不勝，應該係時候贏番鋪，何況回巢嘅宇佐美貴史响對神戶嗰場入咗兩粒之後，上場對綠茵又立咗油，畀個監督長谷川健太省到立立令，今場波點都要做番啲嘢o架嘞。