列頓笑住等拜仁劏

猪拉多纳

1850人小鎮 抽中夢幻籤
德國盃首圈壓軸戲強弱懸殊得交關，第4級別聯賽業餘球隊列頓主場迎戰「三冠王」拜仁慕尼黑，主隊抽到拜仁好似中咗XX彩咁開心，因為今場比賽嘅門票收入同電視轉播收益已經係一筆極可觀嘅財富，不過球隊欠缺實力同經驗，面對拜仁根本冇得揮，「讓球主客和」客軍讓4球都唔算多，黑柴推介「讓球客勝」。

（無綫翡翠台周二凌晨2時30分直播）

列頓係位於德國下薩克森州嘅小鎮，全鎮人口只有1,850人，球隊亦只係踢緊第4級別北部地區聯賽，上季喺16支球隊中排名第9，15場主場聯賽只贏得3場，而且失球數字長期高企，計波根本唔入流。難怪當德國盃抽籤公布時，教頭烏茲勒斯開心到跳舞：「所有人都想抽到拜仁，依家佢哋終於嚟啦！」

哥迪奧拿受壓更肉緊
基於列頓主場只可以容納4,350觀眾，會方為咗迎接呢場「大戰」，特別借用德丙球會奧斯納貝克嘅奧斯拿迪球場做臨時主場，起碼有18,000座位，不過咁亦等於失去埋主場之利，因為列頓球員根本都未喺呢個球場踢過正式比賽。

拜仁今季改由哥迪奧拿執教，較早前喺德國超級盃畀多蒙特技術擊倒，哥帥已經承受巨大壓力，之後奧迪盃雖然先後擊敗聖保羅同曼城奪標，但整體演出仍然受到質疑，拜仁上季攞完完美成績，哥帥一上任就變陣變踢法，當然令人難以接受，其中奧迪盃兩仗，上半場用佢嘅「巴塞式」短傳入滲同「無鋒陣」，效果出奇咁差，但下半場調入箭頭文迪蘇傑，踢番較直接嘅兩翼齊飛，就即刻收效，哥帥唔係蠢人，相信會喺陣式上作出調整，文迪蘇傑料會得到重用，何況今仗係本季首場正式賽事，眾將落場當然會更肉緊，以雙方實力同經驗差距，拜仁要數5、6粒難度唔高。