費倫巴治主場有薩氣

猪拉多纳

歐聯第三圈外圍賽，土耳其代表費倫巴治主場對奧地利球隊薩爾斯堡。首回合薩爾斯堡靠主場之利，與實力較強嘅費倫巴治打和一比一，今次輪到費倫巴治主場出擊，阿King相信費軍會佔得上風，主W有1.7倍值捧。（周三凌晨2時45分開賽）

近幾年土耳其球隊都好捨得使錢買好球員，就如今場主角費倫巴治，陣中有唔少球員都曾經喺高水平聯賽打滾過幾年，包括一對前利物浦球員魯爾梅利斯及古積特。兩位球員大賽經驗豐富，對於費倫巴治喺歐洲賽爭取好成績必有幫助。其他高質外援仲有葡國中堅般奴艾維斯、前祖雲達斯飛翼卡錫及前愛華頓悍將尤保，論質素一定高過冇錢買人嘅薩爾斯堡。

柏迪遜睇高一線
另外塞爾維亞勁旅柏迪遜主場對保加利亞嘅盧多格德斯，同樣捧主W，柏迪遜係歐洲賽常客，加上有主場之利，取勝條件較對手優厚，今場贏波機高。