列斯聯劏山寨車

猪拉多纳

麥達莫盃仔試刀
今晚繼續上演英聯盃第一圈賽事，不乏實力懸殊對決，當中英冠列斯聯主場對乙組仔車士打菲特，主Ｗ仲有1.54倍已經算好分，適合穩陣派嘅朋友，或者用作過關。其實以雙方實力差距及近期狀態計，主隊淨贏兩球已經屬基本消費，2.42倍「讓球主勝」亦值博。

（周四凌晨2時45分開賽）

列斯聯上季成績麻麻，但季尾由前雷丁領隊麥達莫接手執教後漸見起色。麥達莫趁抖暑期空檔，有更多時間準備同部署，球隊表現更加進步，上仗聯賽落後情況下都可反勝勁敵白禮頓，狀態及鬥志一流，前鋒羅斯麥哥馬克更迅速開齋。而且列斯聯上屆英聯盃都打入八強，最終僅被車路士淘汰，絕對唔可以睇小，區區乙組仔車士打菲特攔佢哋唔住。

布力般強鋒數爆卡素爾
同時間另一場英冠名牌布力般流浪作客英甲卡素爾，布力般鋒線人才濟濟，貝斯、杜迪利甘保、佐敦洛迪斯個個有料到，加上中場鄧尼、摩頓柏達臣，進攻點夠晒多。

卡素爾簽下前利物浦箭頭艾莫，呢位小將上仗聯賽已有「士哥」，作用明顯，不過佢哋防線太弱，搞到英甲開鑼戰1比5慘敗畀奧連特，遇上布力般難有運行，客Ｗ及入球大都可取。