皇馬車仔恩仇「大」對決

猪拉多纳

肥安寸王倒戈群星開拖
國際冠軍盃決賽聽朝喺美國新澤西勁爆舉行，皇家馬德里決戰車路士，兩隊教頭會同時掉轉槍頭，領軍倒戈出戰。肥安鬥寸王已經充滿話題性，加埋C朗同莫連奴反面，寸王又要玩殘卡斯拿斯，呢場波雙方之間嘅恩怨，隨時多過深宵港劇爭家產，唔會留手聽朝等睇「大」騷，捧1.55倍入球大！

（now621、632台周四早上9:00直播）

C朗 莫連奴決裂冇留手
皇馬以2:1砌低愛華頓入決賽，表現當然唔算特別好，但其實佢哋收埋唔少主力，留番啲彈藥打車仔。或者大家覺得，安察洛堤同車仔關係唔錯，未必會吩咐球員不顧一切喪攻，但皇馬除咗以隊長卡斯拿斯為首嘅西班牙幫唔妥莫連奴，近排C朗都同寸王決裂，隔空開火互鬧，點都唔覺得皇馬今場會當普通熱身賽踢囉，甚至開拖都唔奇。

車仔留力鬥皇馬未踩油
我哋尋日報道過，C朗已經扭計成功，氹到皇馬加薪續約到2018年，年薪加到成1,700萬歐元，或者多過美斯100萬歐元唔算多，但能夠喺年薪上騎過死對頭，相信C朗會踢得特別醒神，射腳波都有信心啲！加上新帥安察洛堤講過，唔會限制C朗喺球場上嘅活動範圍，只要佢踢得開心就得，淨係呢樣，已經夠C朗為佢搏命省靚個招牌啦！

另一方面，莫連奴成名以來，帶得最失敗嘅都應該係皇馬，冠軍數目唔算多，仲搞到高層、球員同傳媒都同佢過唔去，不過佢返到車仔，似乎係另一個世界，老細阿布暫時好似真係唔干預佢組軍，下放所有權力畀佢搞番好隊波，最近兩場車仔以試陣心態先後以2:0打沉國際米蘭同AC米蘭，仲未踩行油，寸王肯定會落柯打射爆皇馬落卡斯拿斯面，1.55倍入球大抵玩。