銀河夠搏打爆殘兵AC

猪拉多纳

國際冠軍盃參賽隊伍當中，洛杉磯銀河牌面睇落最弱，首場不敵皇馬後更被一致睇淡，不過佢哋憑藉地利優勢，同埋認真嘅比賽態度，最終爆冷砌低祖雲達斯躋身季軍戰，聽朝喺邁阿密迎戰踢熱身賽踢到殘嘅AC米蘭，睇好銀河會再下一城，直插4.6倍主勝。

（now621、632台周四早上6:30直播）

AC連踩兩盃賽踢到殘
奧馬干沙利斯同當路雲早前幫美國勇奪美洲金盃後，返到銀河繼續狀態弗爆，上場先後攻破祖記大門，但最重要係羅比堅尼休養幾星期後，傷愈復出即刻交到貨，後備落場整球靚助攻畀當路雲外，再把握祖記犯錯建功。況且美職幾日後重開，相信銀河今場會寓賽於操，照樣搏到盡。

另邊廂嘅AC米蘭，筆者其實幾戥班球員慘，佢哋同時出戰國際冠軍盃同奧迪盃，短時間走勻西班牙、德國同美國，講真呢種「混合賽」似收買人命多過練兵。頻密賽程亦迫使教練阿里基陣容大輪換，以免令球員未開季就殘，不過咁樣變法，班人變得無所適從，表現走樣，縱使有艾沙拉維同巴洛迪利等球星壓陣都信唔過。

賽制
決賽及季軍戰均以一場過決勝負，90分鐘後打成平手，不會進行加時，直接射12碼分高下。