舜文點評5虎

猪拉多纳

多蒙特 留羅拔仔顯誠意
拜仁最大挑戰者，新兵米希達利恩、奧巴美揚有級數，贏出德國超級盃就係最好證明。佢哋寧願下季免費流失羅拔利雲度夫斯基，今夏都唔賣畀拜仁，顯出爭標誠意。

史浩克04 後防不穩成障礙
小弟由01年開始支持史浩克，呢班波係有質素，上季打起中場達斯拿，呢位小將進步幅度認真驚人。爭標最大障礙係後防不穩，若未能及時改善，將早早被拜仁、多蒙特甩開。

利華古遜 希比亞單飛考牌
雖賣走主力舒賀爾尼，但購入孫弘民同羅比古斯，突擊能力值得憧憬，加上其他新兵加盟，實力可以保持。較大變數係今季由希比亞一人執教鞭，效果尚待觀察。

史特加 有Heart攔路虎
新季增兵好有Heart，睇得出史特加真係想力爭上游。其中簽入上季澳職最佳球員及最佳新人、墨爾本勝利中場馬高洛查士，以及收購利華古遜後防舒華比最有驚喜，如打出水準，可成攔路虎。

禾夫斯堡 冇亂買人夠明智
陣中係有好多好球員，例如迪亞高等，但就硬係發揮唔到。今夏佢哋痛定思痛冇亂買人，反而作出針對性收購，其中引入上季德甲十大中堅之一添姆高路斯就好明智，相信新季成績會唔錯。