多蒙特翻轉奧堡

猪拉多纳

急先鋒攞慣頭彩
首輪德甲全面展開，今晚3場比賽有直播，當中奧格斯堡主場迎戰「蜜蜂兵團」多蒙特。客軍向來係德甲急先鋒，準備工夫不嬲做得比人早，全隊已經蓄勢待發，面對質庸兼失血嘅弱旅奧堡，即使作客都足以輕鬆取勝，推介2.2倍多蒙特「讓球客勝」。

（有線61及201台周六晚9時30分直播）

多蒙特貴為10-11同11-12連續兩屆德甲盟主，上季雖然畀班霸拜仁慕尼黑搶番寶座，卻喺歐聯殺入決賽，球隊進度持續，今季雖然畀拜仁撬走咗「金童」馬里奧葛斯，但得到適當補充後，實力未見削弱，仍然係拜仁最強勁對手，等閒德甲球隊好難頂得佢哋住，何況佢哋喺少帥高普手上做慣急先鋒，近5個球季首輪比賽贏咗4場，今季佢哋嘅準備工夫亦做得出色，喺季前德國超級盃就以4比2技術擊倒拜仁，攞番個彩，然後於德國盃作客輕取威廉港，球員狀態提升得快，加上今季正選人腳變動唔大，夾慣夾熟下盡佔先機。

奧堡痛失南韓雙星
奧格斯堡係不折不扣德甲弱旅，上季護到級存有好大運氣成分，當中進攻線上嘅南韓雙子星具滋哲同池東沅助力極大。不過兩人只係分別向禾夫斯堡同新特蘭借用，今季雙雙歸還原隊，球隊又冇錢補充，實力進一步削弱，今季最重要新兵喺由土耳其特拉布宗自由轉會嘅前德甲兵哈利艾天托普，不過此子闊別德甲多年，亦已年過三十，現階段未必幫到幾多；加上陣中亦有曼寧加、馬素迪莊、奧圖同艾斯泰迪賓斯等主力因傷缺陣，面對歐洲其中一支最強球隊擺明唔夠砌。