玉田圭司翻生鯨吞紅鑽

猪拉多纳

日職打咗十九周，頭四位球隊相距三分，榜首重現亂局，列強實力接近，肯定仲有排鬥。三哥浦和紅鑽今輪作客名古屋鯨魚，鯨魚澳洲長人約舒亞堅尼地及左腳王玉田圭司鹹魚翻生，呢對攻擊組合回勇後好鬼堅，紅鑽讓唔起對手，蘇豪博「讓球主勝」！

（有線61及201台周六晚6時直播）

紅鑽及鯨魚早前先後鬥完英超勁旅阿仙奴，最終同樣輸波，兩隊之後都於聯賽連贏兩場，論態冇得彈。鯨魚近期全面復勇，對上兩戰贏晒轟入六球，中鋒約舒亞堅尼地及箭頭玉田圭司包辦五個士哥，前者傷咗好耐，難得重現佳態，必定冇保留繼續搏。紅鑽後防始終唔穩，難頂鯨魚兩大猛將進襲，讓波靠唔住。

松鼠插水讓唔起櫻花
同日四哥大宮松鼠主場對大阪櫻花，自王牌前鋒路華高域養傷後，松鼠戰績插水，已錄得四連敗，由榜首跌至第四位。大軍近仗有番斯洛文尼亞靚仔箭頭隆比真歷，但踢唔番季初水準，會方仲減磅將巴西中場卡連奴斯柏拉巴借去磐田山葉，中場戰力減弱，讓唔起櫻花，要「讓球客勝」。

（有線64及203台周六晚6時直播）

幾支前列球隊之中，以廣島三箭狀態最弗，球隊上輪硬撼紅鑽輸波，但此前聯賽連盃賽錄得六連勝，水準好穩定。呢班波雖然冇乜星級外援壓陣，但勝在成班土炮眾志成城，三箭進攻主力佐藤壽人及石原直樹長期見勇，今周回師主場對磐田山葉贏得，捧主勝！（有線18台周六晚6時直播）