鯨魚後防甩漏多 紅鑽回勇食過翻尋味

猪拉多纳

日職今日有場好波上演，由近況好唔錯嘅名古屋鯨魚出戰爭標熱門之一嘅浦和紅鑽。兩隊波前排分別同過阿仙奴踢熱身賽，結果同樣輸波，但之後又咁啱齊齊兩連勝！睇番鯨魚近兩季對住紅鑽都輸晒，「格食格」之下，都係要紅鑽穩陣，直取2.18倍客勝！（有線61及201周六晚6:00直播）

近3次對賽贏晒
鯨魚依家只係排聯賽中下游，雖然近況唔錯，不過球隊始終都有唔少問題要解決，好似教練史杜高域本身崇尚進攻足球，以致防守經常出現甩漏，即使近期個勢幾好，但計埋熱身賽連續9場有失波，今場對住攻守實力都咁平均嘅紅鑽，難免畀人睇低一線。

奪標熱門浦和紅鑽之前遇上小低潮，曾經令人擔心，好在近期已經全面復甦，上個禮拜以3:1擊敗榜首廣島三箭嗰場，更加係漂亮一仗，除咗爭冠機會大增之餘，亦打下強心針。提提你，紅鑽近5次對住鯨魚有4勝1和一面倒成績；最近3次對賽，更加係直落贏晒，今場乘勇再贏，都應該無乜問題啦！

頂占筍盤：浦和紅鑽（客勝）