谷戰寸土必爭

猪拉多纳

　　有謂執輸行頭慘過敗家，跑馬亦係一樣道理，如果一匹馬出閘反應唔好，冇得怪責騎師，但假如隻馬出閘順順暢暢，又唔係後上型的話，早段騎師好應該積極取位，爭取有利位置，冇可能隨意跟到咩位就咩位。

　　田草冇咁大偏差，早段冇咁積極，可能影響冇咁深遠，谷草就完全唔同，早段唔畀心機搵位，唔使旨意霸到靚位，幾難避免唔會畀對手頂出三四叠，難聽啲，即係等於慢性自殺。

　　我哋時不時見到，部分谷草內檔馬起步後跑唔夠一、二百米，竟然會在三叠或「大外遊」，好大程度係騎師出閘發夢，又唔努力搵位所致。對於呢啲不良行為，唔應該姑息，要發夢，唔好喺馬背上發，不如早啲唞，無謂喺度累人累物，有失專業操守。