紅魔無氣「細」 韋根死守頂硬上

猪拉多纳

莊家批死尹佩斯踢唔晒全場
英格蘭社區盾今晚喺溫布萊球場勁爆上演，曼聯對韋根牌面上冇得鬥，但紅魔喺新領隊莫耶斯執教下，明顯撻唔着，而且有莊家開出尹佩斯攻入「最後入球」，就會安排部分投X回水，似乎係唔睇好佢踢足全場，既然係咁，進取啲博2.4倍入球細！

（now621及635台周日晚9:00直播）

曼聯拿尼打柴
除咗王牌朗尼因為扭計轉會冇得踢，英超冠軍曼聯仲有翼鋒拿尼因傷要休息，至於熱身賽打得最好，最多波入嘅新仔連格，英國傳媒話佢唔會打正選，地位不穩嘅日本國腳香川真司會得到證明自己嘅機會，不過佢明顯唔係托弗，而且因為曼聯成日話要買法比加斯，搞到佢落場失晒魂咁，係咪幫到曼聯開入球騷，真係好成疑問。

除此之外，愛爾蘭莊家Paddy Power宣布，假如尹佩斯今場攻入「最後入球」，就會自動回水畀買咗「首名入球」、「最後入球」同「波膽」又唔中嘅波友，似係唔睇好喺熱身賽期間受傷嘅佢可以踢足全場，既然尹佩斯被批死踢唔足全場，曼聯今場當然更難開入球騷，就算曼聯近3次出戰社區盾，連開3次入球大、喪入8球都係咁話。

韋根新帥風格「硬淨」
至於上季拎到足總盃冠軍，最後降班收場嘅韋根，以往由馬天尼斯執教，的確好鍾意唔識死同強隊鬥攻，但佢已經過檔愛華頓，新領隊奧雲高尼係穩陣派，而且以往帶領保頓，領軍風格講求硬淨，就算輸都唔似會被任數。而且佢收購後衞白治、巴尼特、湯馬士洛尼同門將卡臣，目的就係要加強後防實力，對住未入局嘅曼聯未必會大敗。

社區盾下半場多入波
對上4屆社區盾，下半場出現13個入球，上半場得5個入波。

曼聯近5次出戰有4次捧盃。

韋根上季聯賽對曼聯，兩循環都係輸0:4。

計埋熱身賽，韋根連續4場半場不失。

韋根下盤抵玩過「讓客」
若果真係睇好曼聯炒唔起韋根，除咗入球細，其實下盤都值得玩吓，事關紅魔讓到1.5/2，韋根下盤就算淨輸兩球都只係輸半個盤，話晒泰國明星隊同橫濱水手都只係輸1球，大阪櫻花同AIK蘇納更加爆冷和到波，證明進入後費格遜時代嘅曼聯，絕對唔及以前恐怖，下盤抵玩過「讓球客勝」。

社區盾賽制
比賽以一場過決勝負，90分鐘後打成平手，不會進行加時，直接射12碼分高下。