幼獅洩氣難炒蘇格蘭

猪拉多纳

U21冇人肯教 鶴臣頂住檔
「幼獅兵團」士氣曳，壓力大，雖有鶴臣督師，但亦難炒「細佬」！國際熱身賽英格蘭U21主場鬥蘇格蘭U21，主隊喺U21歐國盃三戰全敗，信心蕩然無存，客軍鬥「英倫大佬」必搏，今戰主W熱爆，就捧晒「讓球和」同「讓球客勝」，博主隊頂多小勝！

（now 621周三凌晨2時30分直播）

英格蘭一向雷聲大，雨點小，大國腳出晒名心理質素曳，估唔到班細嘅都係得個樣。U21歐國盃及U20世青盃今年先後舉行，英格蘭U21嗰班喺分組賽三戰全敗恥辱出局，U20亦一場都贏唔到無緣出線，英軍年幼階層不知所謂，引來全國傳媒、球迷勁插，呢班小將被剷到上天花板，今場雖有主場之利，但面對巨大壓力，唔係話贏就贏。

史達寧惹官非冇心機
皮雅斯於「幼獅兵團」出局後被炒，早前英足總就公開招聘新帥，到依家都未有聲氣，大國腳領隊鶴臣惟有頂住一場先，為今仗調兵遣將。睇番個陣容，大部分都係早前U21及U20嘅敗家仔，仲要冇埋利物浦中場佐敦軒達臣，雖然補入紅軍翼鋒史達寧，但佢最近惹官非，踢太公波戰意難測，前線無論用域咸抑或哈利卡尼，攻力都唔見得勁。

蘇格蘭同英格蘭同樣來自英倫三島，蘇格蘭不嬲都屈居英軍之後，近年仲愈踢愈曳，甚至畀北愛爾蘭、威爾斯過埋頭，今次蘇格蘭U21乘「大佬」面對內憂外患，當然會搏老命，踩多「幼獅兵團」兩腳。以波論波英格蘭U21當然較勁，但球隊士氣低落或會陷於苦戰，既然主W熱到得1.32倍，就捧齊「讓球和」同「讓球客勝」好過，只要「小蘇兵」唔輸多過一粒都有得執。