意大利阿根廷神級大戰

猪拉多纳

破壞腦殘Vs創造美斯
國際熱身賽之夜，爆發「神與神」對決，意大利主場迎戰阿根廷！「破壞之神」巴洛迪利與「創造之神」美斯正面交鋒，展開一場神級較量，「腦殘」巴洛迪利遇強愈強，歡喜顛覆傳統，早欲挑戰美斯球王地位，勢必使出渾身解數「騷哥利」。美斯破門神力登峰造極，絕非意軍褪色防線能抵擋，加上賽事係為祝賀方濟各當選教宗而舉行，雙方應會大踢悅目足球娛賓，全力推介入球大。

（now632周四凌晨2時45分直播）

巴神攞威做生日賀禮
阿根廷籍嘅方濟各3月獲選為教宗，成為梵蒂岡新領袖，意、阿兩國足總特此安排今場熱身賽，向呢位「球迷教宗」致敬，開波前雙方已獲教宗接見。兩軍召入精銳準備做大騷，主角當然係兩位長期人氣高企嘅巴洛迪利同美斯，一向目中無人嘅巴神曾經講過，只有美斯先至可以同佢相提並論，而佢更喺twitter上載自己別墅前嘅巨大噴泉石碑，上面用金黃色雕刻住「MB45」，仲有花園入面嘅一隻同真獅子同大細嘅裝飾，自大到爆。

不過客觀上，巴洛迪利個人成就同美斯相距甚遠，佢更加想趁今次難得同場競技，證明自己，必然搏命攞威，巴神剛於前日度過23歲生日，幾大都要入波做禮物。

美斯出真功夫獻教宗
至於美斯雖然日前因傷，缺陣對馬來西亞明星隊，但其實傷勢並冇大礙，似係巴塞故意畀佢休息。教宗方濟各早已表明係美斯嘅fans，令佢受寵若驚，梗係識感恩出真功夫，盡情數胡報答教宗支持。另外，拍檔希古恩剛轉投意甲拿玻里，並喺近期熱身賽有出色表現，佢初到貴境，亦渴望喺今場矚目大戰，以入波向意國球迷打招呼。

唔好忘記，阿根廷仲有國際米蘭射手柏拉斯奧、羅馬進攻中場拉美拿、曾効力拿玻里嘅聖日耳門前鋒拿維斯，以及多位意甲兵，領隊沙貝拉明顯想「以意制意」，一來減低球員舟車勞頓之苦，二來佢哋熟悉環境及對手狀況，有助迅速入局火併。

意大利喺柏蘭迪利執教下，已反傳統，變成攻強守弱，睇佢哋6月洲際國家盃5戰入10球失10球嘅大無畏演出，遇上鋒線人才濟濟嘅阿根廷，想少入波都難。