重召拜多7星 德國主場捉圭

猪拉多纳

今晚國際熱身賽仲有一場重量級戲碼，德國於凱沙羅頓嘅費斯禾達主場迎戰巴拉圭，德國之前喺美國之旅殘陣以3:4不敵主隊，今次返到主場作戰，領隊勒夫不敢怠慢，重召上仗因忙於歐聯決賽無緣國家隊嘅拜仁慕尼黑同多蒙特主力，誓要重響勝鼓，巴拉圭態沉弱陣，作客等做炮灰，1.5倍「讓球主勝」可作過關重心。

（無綫翡翠台周四凌晨2時45分直播）

今次德國隊依然未能強陣出擊，拜仁中場舒韋恩史迪加、馬里奧葛斯同史浩克天才達斯拿都因傷缺陣，另一拜仁中場卻奧斯因為即將做爸爸而免役，不過經過重召嘅7名拜仁同多蒙特主力，球隊人腳已經比前齊整得多，中前場有高路斯、馬高列奧斯、湯馬士梅拿同奧斯爾負責攻堅，鋒力回復強勁，加上德甲啱啱開鑼，球員重新操起狀態之餘，體能方面亦唔成問題，今晚當然希望藉主場之利一吐上仗落敗烏氣，爭勝戰意值得信賴。

巴拉圭殘陣態沉
巴拉圭今年提升咗前U20教頭真尼斯領軍，戰績每況愈下，近兩場世界盃外圍賽先後輸畀厄瓜多爾同智利，目前喺南美洲區外圍賽9支球隊中跌至包尾，認真羞家。

巴拉圭目前仍處於青黃不接期，今次到訪德國，仲有包括鋒將奧斯卡卡度素同希度華迪斯等主力缺陣，前線只得老將辛達告魯斯支撐，初次入選球員方面，以受到英超球會阿仙奴力斟嘅安東尼沙拿比亞最受注目，但呢位巴塞隆拿二隊小將只得17歲，恐怕仲未夠火候喺德國地頭攞威，巴拉圭目前甩皮甩骨，好難對德國構成威脅。