比利時托弗大爆法

猪拉多纳

比利時將於今晚深夜喺主場同法國拍跳，比利時近況非常「標青」，近10仗贏咗其中8場。比利時今次友賽徵召咗大批喺英超搵食嘅球員，當中包括愛華頓孖寶費蘭尼同米拿拉斯，仲有車路士三子夏薩特、奇雲迪布尼同盧卡古，班波攻擊力強勁，相信可延續近排場場有入波嘅佳績。

法國近期友賽表現麻麻，連輸三場表現差勁，主帥迪甘斯今次痛定思痛決定徵召一眾近況不俗嘅攻擊好手，包括拜仁列貝利、阿仙奴基奧特同皇馬賓施馬，球隊為求一洗頹風今仗勢必大踢進攻足球，兩隊波駁火捧入球大。（周四凌晨3時開賽）