新加坡硬頂阿曼

猪拉多纳

2015亞洲盃外圍賽A組上演獨腳戲，東南亞球隊新加坡主場迎戰阿曼，主隊德籍教頭史坦治對西亞球壇有深厚認識，今次倒戈鬥阿曼熟晒對手路數，即使新加坡級數輸蝕，仍有力頂住對手。阿曼守強於攻，相信今戰入波唔多，入球細屬投X首選。

（周三晚7時30分開賽）

史坦治早於十幾年前去西亞搵食，2001年執教阿曼國家隊，02至04年就帶領伊拉克國家隊，佢好熟西亞足球，呢次掉轉槍頭鬥阿曼，必定會作出針對性部署。史坦治今年五月接掌新加坡，作出唔少大膽變動，包括召入17歲天才球星沙雲迪，呢個超新星現時効力法國球會梅斯，前途無限。喺史坦治帶領下，新加坡接連輕取緬甸及老撾，演出大有進步，唔好因為排名低而睇死佢哋呀。

嘜死阿曼王牌前鋒
阿曼名氣最大嘅球員係英冠球隊韋根門神艾哈比斯，呢個亞洲頂級門將今次並冇入選，不過，新加坡級數始終較低，估計阿曼防線唔會受到好大壓力，少個門神影響唔算太大。防守從來都係阿曼強項，唔使太擔心，反而進攻先係佢哋最弱嗰瓣，阿曼王牌前鋒艾賀斯尼確係有分量，但球隊過分倚重佢爭取士哥，係人都知要睇實呢個危險人物，佢容易被盯死，預期今戰入波一球起、兩球止。