食得咸魚抵得渴

猪拉多纳

　　有啲地區賽馬文化好地道，好似就近嘅日本，馬迷對騎師奉若神明，對佢哋好恭敬，十足十對明星一樣。但喺香港就好唔同，賽日某騎師輸得幾隻熱門，場內馬迷話之你係邊個，一定「開汽水」。

　　香港馬迷比較實際，又可以話較為現實，邊個騎得唔好，即時有反應，唔單止在沙圈噓聲四起，出入凱旋門時，一樣群起圍插，理得你係十幾屆冠軍韋達，1個馬迷開始噓，之後就會變10個、100個，柴台聲音周圍都有。

　　好多外國騎師見得多，通常會一笑置之，但有啲抵唔住頸，可能在沙圈口黑臉黑，但如果佢哋諗深一層，唔係熱倒連場，又點會畀人噓？你估馬迷傻到好壞不分？！錯在自己唔生性，累及馬迷輸錢，身為騎師，應該食得咸魚抵得渴，畀人發洩吓，硬食啦。