紅軍細演楝篤笑

猪拉多纳

阿蘇停賽 攻力打七折
「紅軍」上季喺主帥羅渣士帶領下攞第七名，下半季愈踢愈順，短傳入滲踢法悅目又實際，不過，講到尾都係要靠蘇亞雷斯串連中前場，冇佢效果差好遠。「哨牙蘇」今年四月咬車路士守將伊雲洛域被重罰停賽十場，家陣仲要坐六場越季波監，開咧戰唔使預佢，利物浦今戰冇阿蘇，咁前面就要靠傷愈冇耐嘅史杜列治擔大旗，呢個英格蘭前鋒射術係好，衰在有啲獨食，但蜀中無大將，都要搵佢作先鋒。

史篤城擺鐵桶頂得住
「紅軍」今季食粥食飯其實係要睇進攻中場菲臘比古天奴嘅表現，唔少利迷叫佢做「古天樂」，呢個巴西版古仔自己搵到食，畀波亦得，喺「沒有阿蘇的日子」責任變得更重大，今戰若想撕破史篤城大舊佬防線，就要靠晒佢啲致命直線喇！

史篤城上季完成護級任務，高層卻照炒主帥佩利斯，真係唔知佢哋諗乜！大軍新季由曉士帶隊，相信唔少球迷都記得佢上季季初點樣搞到昆士柏流浪冧檔，不過，史篤城好就好在冇乜錢畀佢亂花，現時人腳冇乜大變，睇番季前熱身賽，佢哋都係用班打仔踢簡單足球，首周聯賽作客專心死守打突擊，正路頂得住，結合近兩次聯賽作客晏菲路都互交白卷嘅靚績，細盤可試。