史雲斯加碼驅魔

猪拉多纳

趁莫耶斯未執掂隊波
英超王者曼聯衞冕第一擊作客鬥史雲斯，「紅魔鬼」進入後費格遜時代問題多多，大軍今夏增兵處處碰壁，主力射手朗尼又有離心，新帥莫耶斯擺明舞唔掂隊波。史雲斯淨係射手米捷一個已經好難對付，今季仲多埋猛人韋菲特邦尼幫手，曼聯讓波牙煙，今場要「讓球主勝」！

（now 621及620周日凌晨零時30分直播）

曼聯上場殺敗韋根贏得社區盾，新帥莫耶斯叫做有個好開始，但呢隻盃仔未能蓋過佢領軍初期所面對嘅問題。「紅魔鬼」新季冇乜新兵，呢點所有球迷都知，莫帥又點會唔知吖，依家唔係佢唔想買人，而係買唔到人，今夏重心收購目標堤亞高艾簡達拿爭輸畀拜仁，又唔夠牙力撬唔郁法比加斯，近日傳出想斟奧斯爾，睇怕都係得個講字。

曼聯增兵不成朗尼扭計
「紅魔鬼」增兵不成，好衰唔衰朗尼又扭計，佢同莫耶斯早於愛華頓時期已交惡，相信都好難共事，雖然莫帥死撐話朗尼係非賣品，講到佢好重要，但相信呢位球星就算留隊都係冇運行，今戰亦未必會落場。曼聯右閘拉菲爾達施華有傷肯定缺陣，快翼艾舒利楊格及中場卡域克亦有傷，翼鋒拿尼及查維亞靴南迪斯缺態，戰鬥力要打折扣。

史雲斯上季捧走聯賽盃賀創會100周年，新季加碼簽埋科特迪瓦射手韋菲特邦尼，大軍控球能力強，但踢得較迂迴，而且進攻太倚重中鋒米捷，家陣有埋把握力強嘅韋菲特邦尼助陣，前線侵略性進一步提高。曼聯上季兩戰史雲斯一勝一和，作客畀米捷士哥逼和一比一，主場搏到尾段先由里奧費迪南奠勝，贏得辛苦，史雲斯依家變得更強，今戰有力搶分！