紅鑽追榜首橫掃三神

猪拉多纳

大家好，我係Aiyana，啲人通常都會叫我「妹頭」。平時做DJ打歌、喺錄影廠做直播講波就多，但今日手寫波經同大家分享日職心水，就真係第一次啦！

既然係初試啼聲，梗係要穩陣啲好，小妹呢個禮拜專心鑽研有線球彩台同高清203同步直播嗰場浦和紅鑽主場對大分三神嘅賽事。我就睇好紅鑽可以輕取對手！點解呢？有主場之利仲要對住榜尾嘅三神喎，相信都好難甩拖囉！（有線64及203台周六下午5時直播）

三神疊埋心水返日乙
紅鑽依家同榜首嘅廣島三箭相距5分，話多唔多話少唔少，球隊擺明冇失分空間，若然再被對手拋甩，冠軍就會愈離愈遠！紅鑽呢場波3分可以話無走雞，因為榜尾嘅三神喺聯賽只係贏過新潟天鵝。而且自日職喺七月重開以來，佢哋七場波只係得兩和五負未贏過，咁嘅戰績可以話完全唔夠班踢日職，睇怕佢哋依家都係等日子盡快過去，疊埋心水下季返日乙。

紅鑽前線攻擊組合原口元氣同興梠慎三表現出色，佢兩個今屆喺聯賽入咗14球，其中興梠慎三有6個入球全部嚟自主場，加上那須大亮嘅後上助攻不時有斬獲。紅鑽依家能夠排喺第三，都係同球隊攻力強勁有關，好多時仲係下半場以「狂風掃落葉」姿態，喺最後15分鐘大掃一輪，咁就射入咗17球喇！紅鑽有主場又有腳頭，三神勢弱兼未夠班，呢場揀「讓球主勝」就啱數啦！