反歐聯球隊

猪拉多纳

上周重心推介英甲賓福特，佢哋順利砌低錫菲聯，真係好嘢！肥叔喺菠菜行業打滾多年，喺英倫有人脈，賓福特主理人後生可畏，亦有涉足菠菜業務，佢好尊重肥叔，今次見面有交流業界行情，又傾波經，講足幾個鐘頭。佢好有心搞波，將菠菜業務交畀副手，專心打理球會，目標係殺上英超。

英超今日正式開咧，肥叔有同賓福特主理人傾今季英超大勢，冠軍之爭不離三隊，曼市雙雄同車路士，佢本身有晒心水，預計曼城會拎冠軍，車路士攞第二，曼聯就係第三，呢個預測好正路。肥叔今季都唔睇好曼聯，始終佢哋個新帥莫耶斯未夠班，拍埋莫連奴度卡士輸晒，人腳又唔係特別好，好難爭！

蘇斯達留力周中搏殺
講番推介，今次主力反啲歐聯參賽隊伍，呢個賽事係全球最矚目嘅盃賽，有名又有利，各國參賽隊全副精神爭位，暫時將聯賽擺埋一邊。西甲球隊皇家蘇斯達班底唔強，難兼顧西甲同歐聯戰線，嚟緊下周中歐聯先係出擊重心，今輪主場對基達菲唔會去盡，讓波靠唔住，呢場捧基達菲！

（周日凌晨1時開賽）

勝率逾9成些路迪又食鴨
《球績廣場》為大家搜集各種紀錄、戰績，作投X參考。頭炮推介蘇超鴨巴甸主場對些路迪，上季聯賽冠軍些路迪慣食「鴨」，雙方近11次交手，些軍取得10勝1和，勝出率超過90%，包括上季3次交鋒全勝，難得今場客W仲有1.72倍，的確筍爆。些路迪對賽成績上擁有壓倒性優勢，但要留意佢哋往往下半場，先至發力擊潰鴨巴甸。近7次對賽，有6次上半場打和，其中4次更係互交白卷，2.15倍半場和亦值得考慮。（周六晚7時30分開賽）

錫菲聯讓得狠有料到
周末英甲有12場比賽舉行，其中錫菲聯主場對高車士打最為「有趣」，話晒高車士打係聯賽兩戰兩捷，屬季初其當弗球隊之一，但奇就奇在主隊要讓高車士打半一咁多，賠率完全同近績不相符，超級蠱惑。

其實大家都知錫菲聯已經兩連敗，英聯盃輸過畀伯頓之後，上周又以較大比數不敵競爭對手賓福特，計賽績唔係高車士打個皮，但今日執番主場之利即刻熱透，擺到明有計。錫菲聯被認定為來季升班熱門球隊，球迷唔好咁早睇衰佢哋，呢個上盤應該可以順利開出。（周六晚10時開賽）

ＱＰＲ退熱咪走寶
《We Trick》首次同大家見面，此欄專門幫大家發掘一下有咩蠱惑波，今日頭炮推介英冠昆士柏流浪（QPR）。昆士柏流浪今季由英超降落英冠角逐，雖然有多名大牌球星基斯杜化森巴、雷米、朴智星、泰拉拔先後離隊，但由於有名帥夏利列納領軍，依然被外界視為升班大熱，首輪聯賽擊敗錫周三及於英聯盃淘汰埃克塞特亦表現得十分對辦，點知上輪作客去季護級球隊哈特斯菲爾德卻只能打和1比1，累死唔少上盤客。

睇番佢哋過去兩季連盃賽在內，原來從未試過三連勝，上場贏唔到似乎唔係表現唔好咁簡單，夏利叔打滾球壇多年，脈絡唔簡單，今次返回主場對住作客兩連敗嘅葉士域治，上盤讓半一明顯退晒熱，相信又係起筷時候。（周六晚10時開賽）

米堡主帥博炒難讓黑池
《鋪針插線》首次同大家見面，我哋喺歐洲各大小球會都放晒針，出盡法寶勁刮各支球隊背後猛料、秘料，大爆佢哋鮮為人知嘅一面，為讀者作出「深層推介」。

今日首先送上英冠米杜士堡內亂作為見面禮，米堡領隊莫比利自2010年上任後冇齣好戲，今年又話要衝擊前6，球迷都覺得佢廢噏當秘笈。莫比利近期棄用當家前鋒安尼斯，又公開話班球員冇用，長年累月踢唔出自己賽前部署，激到老細史提芬吉遜生蝦咁跳。球隊極高層消息透露，英國時間周四史老闆捉住呢名庸帥照肺，據講雙方現時關係緊張。一向「賴皮」嘅莫帥分分鐘亂嚟博炒，今晚主場都讓唔起黑池平半。 （周六晚10時開賽）