3件門將打晒柴 黑仔鳥棲勁「大」劑！

猪拉多纳

一隊3個龍門都傷晒，另一隊就剛啱炒咗教練，騎呢到搵總經理教波，鳥棲砂岩、大宮松鼠兩支最黑嘅日職球隊對碰，今場波唔玩1.62倍入球大，仲有乜好玩呢？（有線18周六晚6:00直播）

如果計黑仔程度，今日主場嘅鳥棲砂岩都算極品，由第一至第三號龍門早赤星拓、室拓哉同奧田達朗全部打柴，完全無人守龍，搞到要向清水借用林彰洋，再越級提升福岡大學個21歲o靚仔藤島榮介，先至唔使中門大開。但係好衰唔衰，前日連鋒將野田隆之介都傷埋，真係顧得頭嚟腳反筋，黑到冇人有。

松鼠炒教頭搵GM領軍
大宮松鼠呢？聯賽慘遭5連敗，激到班頭頭生蝦咁跳，5日前怒炒鬼佬教頭維迪尼克，叫總經理岡田武行頂檔教波。問題係，一個GM如果識教波，早就做咗Coach，使乜走去管行政吖！何況大宮最大問題係後防唔掂，傾緊嗰件澳洲國腳盧卡斯尼爾又未簽約，剛啱羅致嘅仙台中場和田拓也莫講唔係踢開後衞，就算係都同隊友冇默契啦，對條防線根本冇乜幫助。

好嘞，兩邊後防都唔多掂，咁你會玩邊瓣吖？唔使講一定係博入球大喇，何況鳥棲由99年起主踢13戰大宮，開咗9大4細，條攤路清清楚楚擺响度，無謂拗氣喇！